СЕКОЈ НЕЈЗИН СОН ЗАСЛУЖУВА ЖИВОТ
Мисија и визија
Фросина остави зад себе цел свет што допрва требаше да го создаде. Стотици цртежи. Колекции што ги гледаше пред да постојат. Иднина што ја замислуваше со искри во очите. ARE U KUL е местото каде што тој свет продолжува да добива живот.
Нашата мисија
Да го оживееме она што Фросина го носеше во себе. Секоја линија што ја нацртала да стане форма. Секоја замислена боја да допре ткаенина. Секој модел што останал на хартија да добие движење, присуство и свој пат низ светот.
Во секое парче да остане препознатлив нејзиниот глас: храбар, слободен, свој. Да ја зачуваме верноста кон нејзините оригинални идеи и љубовта со која ги создаваше. Кога некој ќе ја облече нејзината креација, дел од светот на Фросина повторно ќе зачекори меѓу луѓето.
Во срцето на брендот е нејзината порака: „Не си скршен. Диско топка си.“ Парчињата можат да ја носат светлината. Убавината може да се роди и таму каде што животот оставил најдлабока пукнатина.
Нашата визија
Го гледаме името на Фросина на колекции што ќе патуваат подалеку од местата до кои таа успеа да стигне. Нејзиниот талент да биде виден, нејзините идеи да бидат носени, а нејзината смелост да им даде храброст на луѓето да ја покажат сопствената различност.
ARE U KUL да расте како жив творечки свет: секоја нова колекција да отвора уште една страница од нејзиното наследство. Да создава убавина што се чувствува, облека што носи приказна и средби во кои нејзиното име се изговара со љубов.
Сакаме од нејзините соништа да никнуваат можности за други млади луѓе. Нечиј талент да добие поддршка. Нечија идеја да добие прва шанса. Нечие утре да стане посигурно. Така нејзината светлина ќе продолжува да стигнува и таму каде што допрва ќе биде потребна.
Мојот завет кон Фросина
„Јас ќе го претворам секој твој неостварен сон во дело. Ќе му дадам живот на секој твој цртеж, форма на секоја твоја идеја и пат на секоја твоја замисла. Ќе го носам твојот свет во моите раце и ќе продолжам да го создавам со љубовта со која те носам во себе.“
Ова е заветот на една мајка кон својата ќерка. Нејзини се соништата, талентот и творечкиот потпис. Мојата одговорност е да им овозможам да продолжат да живеат. Секоја остварена креација ќе биде уште едно исполнето ветување кон мојата Фросина.
Камелија Кулакова · мајката на Фросина03 / ФОНДАЦИЈАТА
Од нејзините соништа,
до нечие ново утре.
ARE U KUL и Фондацијата „Фросина Кулакова“ ги поврзува истата љубов. Брендот им дава живот на нејзините креации. Фондацијата ја продолжува таа љубов преку грижа за луѓето и можност за младите да го остварат својот талент.
Нето-добивката од продажбата на колекциите е наменета за фондацијата: за стипендии, едукација, сообраќајна безбедност и поддршка на семејства погодени од сообраќајни трагедии.
Зад секое продадено парче стои можност нејзиното дело да стане и нечие охрабрување, поддршка или нов почеток. Еден сон на Фросина оживува — и му помага на друг сон да добие крилја. Тоа е љубовта што сакаме да ја оставаме во светот, во нејзино име.
Што поддржува фондацијата?
Стипендии за млади таленти, активности за сообраќајна безбедност и поддршка за семејства погодени од сообраќајни трагедии.
Дали ќе има изработка по нарачка?
Покрај постојната колекција, предвидена е можност за изработка по нарачка. Деталите за моделите, мерките и роковите ќе бидат објавени со каталогот.
Кога ќе биде достапно купувањето?
Каталогот и онлајн-продажбата се во подготовка. На оваа страница сè уште не се примаат нарачки и плаќања.
